आई: एक सुंदर जग!
Mother : A World of Infinite Memories
आज मातृदिन... जगभरात आईबद्दल बरंच काही लिहिलं जातंय, बोललं जातंय. पण माझ्यासाठी आई म्हणजे केवळ एक शब्द नाही, तर ते एक संपूर्ण 'सुंदर जग' होतं.
दुःखातून जन्मलेली लेखणी
आई देवाघरी गेल्यानंतरच्या त्या दहाव्या दिवशी मी पहिल्यांदा लेखणी हाती घेतली. मन सुन्न होतं, पण भावनांचा बांध फुटला होता. त्या विरहाच्या वेदनेतून अवघ्या तीन दिवसांत १५० हून अधिक चारोळ्या कागदावर उतरल्या. याच भावस्पर्शी शब्दांतून पुढे माझा 'आठवण' हा चारोळी संग्रह प्रकाशित झाला.
शिक्षकाची पत्नी, पण कष्टाची ओढ
माझी आई एका माध्यमिक शिक्षकाची पत्नी होती. घराण्यात मान-सन्मान होता, पण तिला त्याचा कधीच गर्व नव्हता. आमचं वास्तव्य आसखेडा येथे होतं, तर आमची शेती ६ किलोमीटर दूर 'जायखेडा' शिवारात होती. आजही डोळ्यासमोर येतं, आई दररोज ते ६ किलोमीटरचं अंतर पायी कापून शेतात जायची. ऊस, पेरू, बाजरी आणि कडधान्य अशी पिके तिने रक्ताचं पाणी करून फुलवली.
नियोजनाची 'तज्ज्ञ' माऊली
आईचं शेतीकामाचं नियोजन पाहण्यासारखं होतं. केवळ शेतीच नाही, तर तिने पशुपालनातही यश मिळवलं होतं. गाय, म्हैस, शेळ्या आणि अगदी कोंबड्या सुद्धा तिने मोठ्या मायेने पाळल्या होत्या. तिचा स्पष्टवक्तेपणा आणि बोलका स्वभाव यामुळे ती सर्वांना आपलीशी वाटायची.
नातेवाईकांच्या आठवणींतली 'आई'
आजही जेव्हा गावी जातो, तेव्हा नातेवाईक आणि जुनी माणसं आवर्जून म्हणतात, "तुझ्या आईसारखी दुसरी आई नव्हती!" त्या एका वाक्यात तिचं संपूर्ण आयुष्य आणि तिचे संस्कार दिसून येतात. ती आठवण काढली की मी आजही भान हरपून जातो.
संस्कारांचे अमरत्व
आईचा सहवास मला खूप कमी कालावधीसाठी लाभला, ही खंत मनात आहेच. पण तिने दिलेले 'खानदानी संस्कार' आजही माझ्या रक्तात धावतात. ती आज प्रत्यक्ष सोबत नसली, तरी मी रोज तिच्याशी बोलतो. आयुष्याच्या प्रत्येक वळणावर तिचे तत्व आणि तिची शिकवण मला आजही मार्गदर्शन करत आहेत.
निष्कर्ष:
मातृदिन केवळ आजच्या दिवसापुरता मर्यादित नसून, आईने दिलेले संस्कार आयुष्यभर आचरणात आणणे हीच तिला खरी श्रद्धांजली आहे. तिच्या अनेक आठवणी मी माझ्या हृदयाच्या कप्प्यात जपून ठेवल्या आहेत.
आई, तू केवळ आठवणीत नाहीस, तर माझ्या प्रत्येक कृतीत आणि संस्कारात जिवंत आहेस!तुला विनम्र अभिवादन! 🙏
"तिच्या स्मृतींना वाहिलेली माझी ही शब्दसुमने..."
आई : एक सुंदर जग
मुलांच्या विश्वात रमण्याची तिला घाई असते,
सुख-दुःखात साथ देणारी ती माई असते,
ते सुंदर जग म्हणजे आई असते...
पतीचे विश्व समृद्ध करणारी ती गृहिणी असते,
संसारासाठी जीव ओवाळणारी ती माऊली असते,
ते सुंदर जग म्हणजे आई असते...
जिच्यामुळे कुटुंब एकरूप होते अशी ती प्रित असते,
मातृत्व सफल करणारी ती एक माया असते,
ते सुंदर जग म्हणजे आई असते...
छत्रछाया देणारी ती मुलखाची ताई असते,
कुटुंबाचा आधारवड होणारी ती सावली असते,
ते सुंदर जग म्हणजे आई असते...
आंधळ्याची दृष्टी तर पांगळ्याची पाय असते,
दुधावरची साय तर वासरासाठी गाय असते,
ते सुंदर जग म्हणजे आई असते...
हंबरड्याचा पान्हा तर कुटुंबाचा कणा असते,
थकलेल्याचा टेकू तर आनंदाचा झरा असते,
ते सुंदर जग म्हणजे आई असते...
उन्हाळ्यातला गारवा तर जीवनाचे सार असते,
वादळे सोसूनही सुख देणारे भांडार असते,
ते सुंदर जग म्हणजे आई असते...
मातीशी इमान राखणारी ती भूमिका असते,
सेवा, समृद्धी, त्यागाची ती मूर्ती असते,
ते सुंदर जग म्हणजे आई असते...
नाशिक
deepakahire1973@gmail.com
